Отпадната вода – клучен начин за следење на инфекции
Тестирањето на отпадните води е еден од главните начини за проценка на распространетоста на заразни болести кај популацијата. Истражувачите земаат примероци од различни постројки за пречистување на водата низ земјата и ги користат резултатите за да разберат кои области моментално имаат највисоки стапки на инфекција. Методот беше користен за време на пандемијата на COVID-19 за да се следат стапките на инфекција во заедниците и да се насочат јавните здравствени мерки.
Жуген Јанг, професор во областа на биосензорите и здравјето во животната средина на Универзитетот Кранфилд, го водеше развојот на сензорите за следење. Ова е продолжение на неговото истражување спроведено во 2020 година за развој на тест за откривање на SARS-CoV-2 (познат како COVID-19), инфлуенца А и инфлуенца Б во отпадни води користејќи платформа од хартија и УВ-факел или камера од мобилен телефон.
Извор: Freepik
До сега, најточните начини за тестирање на примероци од отпадни води беа методи како тестот за полимераза верижна реакција (PCR), кој мора да се спроведе во централизирани лаборатории од добро обучен персонал. Тоа значи дека примероците се собираат, складираат и транспортираат во ладен синџир до лабораторијата пред да бидат обработени, што може да трае неколку дена и е релативно скапо.
Тестот на база на хартија-оригами се чита со мобилен телефон
Новиот тест-метод е брз, лесен за користење и пренослив. Примероците од отпадни води се ставаат на восочен лист хартија, кој потоа се преклопува во оригами стил. Хартијата содржи хемикалии кои реагираат на одредени маркери за болести, предизвикувајќи појава на флуоресцентна боја. Резултатите може да се читаат со камера од мобилен телефон и податоците брзо да се соберат.
Професорот Јанг го разви новиот метод како дел од националната програма за следење на отпадните води за COVID-19. Во 2021 година, кога беше врвот на пандемијата, тој спроведе теренски тестови користејќи го тестот во четири хотели кои беа претворени во карантин околу аеродромот Хитроу. Целиот процес од земање на примерок до добивање на резултати траел помалку од 90 минути, во споредба со околу четири часа за PCR тест, и тестирањето се вршело во подрумот на еден од хотелите користејќи минимална опрема. Резултатите покажале дека овој нов уред дава резултати барем исто толку точни како PCR тестот, но со многу помал трошок и може да обезбеди рано предупредување за болести во заедницата. Уредот е особено корисен за области со ограничени ресурси поради лесното користење, ниската цена и брзите резултати.
„За време на COVID-19 докажавме дека брзата анализа на отпадните води од заедницата е навистина ефикасен начин за следење на заразни болести и помагање во управувањето со јавното здравје. Едноставниот тест што го создадовме чини само 1 фунта и ја користи вообичаено достапната функција на камерата во мобилниот телефон, па затоа го прави лесно достапен. Ова може да биде вистинска пресвртница кога станува збор за предвидување на стапките на болести и подобрување на јавното здравје во услови на идни пандемии“, рече Жуген Јанг, професор во областа на биосензорите и здравјето во животна средина на Универзитет Кранфилд.
Извор: Freepik
Уредот беше претставен во Лондонскиот музеј на науки, признавајќи го неговиот придонес во Националната програма за следење на отпадни води за време на пандемијата на COVID-19.
Понатамошниот развој на тестот е спонзориран од програмата за истражувачко лидерство на Фондацијата Leverhulme и со грант од Истражувачкиот совет за биотехнологија и биолошки науки. Во иднина, тој потенцијално би можел да се користи за следење на нови варијанти и да помогне во утврдувањето дали одредена варијанта сè уште се шири во заедницата, како и за следење на антимикробната резистенција од здравствена перспектива.
Трудот за хартиениот микрофлуиден сензор кој овозможува брз надзор на отпадните води на лице место во заедницата е објавен во списанието Cell Reports Physical Science, а во него учествуваа и научници од Универзитетот во Глазгов и Универзитетот Џеџијанг во Кина.
Извор: Nnews-medical.net
